بابا وماما متجوزين بقالهم 33 سنه ومن 15 سنه بابا حصلتلة حادثه ومن بعدها مابقاش يقدر يتحرك ولا يشتغل ولا بيقدر يعمل اى مجهود كان عندى وقتها 8 سنين واختى الكبيرة كانت فى اعدادى واخويا الصغير كان عنده 5 سنين
بابا عنده اخ واحد بيشتغل فى الخليج وبينزل كل سنه فى شهر 7 وعمرة ما فكر يساعدنا او يدينا جنيه ولا حتى يجيب لحد فينا طقم جديد ولا فكر يساعد بابا فى مصاريف البيت واحنا كلنا ساكنين فى بيت عيله
وبرغم ان عمى عنده بيوت تانيه فى اماكن تانيه بس لما بينزل بيجى يقعد فى بيت العيلة ده عشان مراته واولاده عايشين فى نفس البيت اللى احنا عايشين فيه
لما بينزل بنتجمع كلنا عند جدى وبيدى جدى وجدتى هدايا كتير وبيجيب لعياله حاجات كتير جدا وانا واخواتى بنقعد نتفرج عليهم
وكمان علشان عايشين فى بيت العيله بياخدو من امى فلوس المية والكهرباء والاسانسير ومع ان البيت فى مكان راقى جدا واحنا شكلنا يبان ان مستونا كويس الا امى علشان تقدر تتحمل مصاريفنا
وتعليمنا واكلنا وشربنا ممكن تجيب لكل واحد فينا طقم جديد كل سنتين مره وماحدش فيهم بيحبنا لان امى مش من العيله وعمى على طول بيحب يذلنا مثلا يجيب لعب وهدايا ويتصل بماما يقولها معلش نزلى البنات يطلعولى شوية حاجات
ولما ننزل يدينا اللعب والحاجات ويقولنا معلش طلعوهم البيت عندى علشان ورايا مشوار طب ما تخلى عيالك هما اللى ينزلو ياخدو حاجتهم لكن مكناش بنرضى نشتكى لماما عشان هي دايما حزينه وفيها اللى مكفيها المهم عمى ده مابيفهمش فى السوشيال ميديا
ادانى مره تليفونه اظبط له حاجه فبة وانا بظبطلة التليفون جتلة رساله من رقم متسجل بحبيبتى وقتها هو كان بيصلى ففتحت الواتساب بتاعه على اللاب توب بتاعى ودورت فى الفيس بوك لقيت عنده اكونتات تانيه غير اللى احنا نعرفه ففتحت الجى ميل بتاعه من عندى وعرفت انه متجوز على مراته واحده من الخليج وعنده عيال اكبر منى وعمل علاقات كتير هناك مع فلبينيات ومتصور صور معاهم كمان اخدت اسكرين شوت لكل حاجه وهددته لو ما دفعليش 500 الف جنيه هقول لمراته اللى هنا كل حاجه وهبعت لمراته التانيه صوره مع الفلبينيات وهو كده عارف ان بيته هنا هيتخرب وبيته هناك كمان هيتخرب
لان مراته الى هنا اهلها ممكن يوده فى 60 داهيه لانهم وصلين جدا
عمى مسك المصحف وحلفنى انى لو اخدت الفلوس مش هاحكى حاجه وهيشتريلى موبايل ولاب توب جديد عشان انا مهندسه وهيشتريلى لبس وكل حاجه انا عايزاها وطبعا اخواتى زيهم زيى وفعلا حلفت لية على المصحف واخدت الفلوس ونزلت اجيب بيهم جينهات دهب وخبتهم واهلى استغربو هو ليه عمى بقى يعمل كل ده وجاب الموبايلات والابتوبات دى ازاى وخليته يعمل لماما كمان شهريه كبيرة ويقولها ما تنزلش تشتغل لان امى اصلا جالها خشونه فى الركبه ومابقتش تقدر تقف على رجليها فترات طويله زى زمان وكمان يحط وديعه فى البنك بحساب مشترك بينى و بين اخواتى وقال لماما انه حط الفلوس دى فى البنك باسمنا عشان لو حصل ليه حاجه يأمن مستقبلنا وطبعا كل الكلام ده عمله من ورا مراته لانها بتكرهنا وهى بترفض انه يجيب لينا اى حاجه فانا حاسه انى جبت حقى وحق اخواتى
بس دلوقتى انا عايزه افضحة عند مراته اللى هنا ومراته التانيه اللى فى الخليج لان كل لما اشوفه مش بقدر انسى اللى عمله معانا السنين اللى فاتت بس خايفه علشان انا حلفت على المصحف
فهل لو انا حكيت ليهم وبعدها صومت 3 ايام ربنا هيحاسبنى على الحلفان اللى حلفتة على المصحف؟, Society Problems
أكتوبر 24, 2023
-
النهارده بس
مشاكل عائليه
- كتبو Society Problems
