السلام عليكم والله يا استاذ انا امي استلفت ٨٠٠ جنيه من ناس جيرانا علشان خطيبي كان مسافر ومش هيرجع غير بعد العيد فكان لازم نعزمه على الفطار قبل مايسافر فماما اتصرفت في الفلوس علشان لسه مقبضناش المعاش و عملت ما بوسعها علشان تعمل عزومه تشرفني قدامهم فمكنش متاح بالفلوس اللي معانا ديه غير نجيب سمك لانهم حوالي ٥ واحنا ٤ وانت عارفين اللحمه والفراخ هتتكلف كام دلوقتي لو حبينا نجيبهم للعدد ده غير جنب الاكل لازم حلويات اوفاكهة فعملنا السمك وهما لما شافوا السمك معجبهمش وقالي هو حد بياكل سمك في رمضان فين المحاشي والبشاميل واللحمه بضحكة سخريه ومامته قالت الدكتور مانعني من السمك ونفس الموضوع اخته وكنا في نص هدومنا وهما قاعدين وممدوش ايدهم في الاكل لو سحمتوا تصورا انتم الموقف يبقى عامل ازاي حتى مجبروش بخاطر امي وتعبها وجاريها من قبلها بيموين علشان تقضي الفلوس وتجيب الاكل ومخافوش على زعلنا وهو قال قاعد محروج من اهله علشان احنا مشرفناهوش قدامهم ويقولي دانا جايبلك علبه كنافه من ايتوال علشان اشرفك وانتي ليه مضغطيش على امك تعمل حاجه غير ديه طيب ليه مقولتيش انكم هتعملوا السمك ده وانا حاسه اني كنت في كابوس ده انا لسه مخطوبه يوم ٢٧ يناير اللي فات هعرف منين بيحبو ايه ومش بيحبوا ايه ومشيو قبل اذان العشاء علشان يشوفوا يفطروا ايه علشان مامته تاخد الدوا بتاعها النتيجه امي زعلت لما الضغط بقى عالي جدا وكانت هتوصل لجلطه لولا ستر ربنا انا مش عارفه اعمل ايه احنا ناس على قد حالنا وايتام وملناش غير ماما وخالنا بيجي في المناسبات وانا زعلانه من اللي حصل ده ومش عارفه اخد موقف صح لاني معرفش هما عندهم حق ولا لأ انا كتبت وعارفه ان حد فيهم ممكن يشوف رسالتي ديه بس انا مش خايفه من رد فعلهم لاني زعلانه على كسر خاطرنا وبالأخص زعل ماما لأن محدش يعرف هي تعبت ومازالت بتتعب معانا ازاي وبتعمل ايه علشان تسترنا وتجهزنا وتصرف على اخواتي في التعليم وانا متكملتش معاه من يوم الاحد في الموضوع ده وهو قصر معايا في السؤال من يومها وانا كمان مبقتش اسأل اسفه يا استاذي لو طولت عليكم بس جوايا كلام كتير اوي بس ده المختصر للموقف اللي حصل, Society Problems مارس 30, 2023