انا مشكلتي تافهة جدا بس هحكي details علشان تفهموني ...هو انا لازم الشخص الهتجوزه يكون باهرني ؟ انا بقالي سنة و شوية تقريبا اعرف خطيبي عرفنا بعض عن طريق ناس صحابنا حبينا بعض و اتعلقنا ببعض قوي و بعد ٧ شهور اتخطبنا اوقات كتير بتعدي عليا بحس اني بحبه جدا و اوقات تانيه بحس اني عادي او اقل من العادي ال هو يلا نتجوز اهو انسان محترم و هيراعي ربنا فيا بدل ما افضل قاعدة لوحدي لاني بقيت ٣٠ سنة و اهو اخلص من زن ماما و كلام الناس السخيف بس برضه فكرت اني ابعد عنه بتموتني مقدرش اعيش منغيره كأني بحبه بس نفسي اغير في شوية حاجات هيكون بنسبالي mr perfect كلها حاجات تافهه بس ما يمكن انا اصلا تافهه مش لازم اجوز حد احضر بيه دكتوراه يعني. مثلا انا بحب اهتم بلبسي و شكلى بسافر كل سنة اجيب لبسي من برة انا من ساعت ماعرفته عمره ما نزل عمل shopping و مابيعجبنيش لبسه معظم الوقت بيكون نفسي ياخد باله من مظهره و يلبس حاجات روشه عادي هو بنسباله دي مش أساسيات هلبس الحاجة المكويه في الدولاب لما نتجوز ياحبيبتي لبسيني براحتك مثلا انا مجتمعي انا و صحابي ممكن يكون مش معانا فلوس كتير بس نلبس انضف brands علشان مظهرنا الاجتماعي هو بنسباله ليه ندفع ١٠ آلاف في جزمه ما ممكن اجيب واحدة براند اقل ب ٤ مثلا مع ان هو مقتدر يجيب الغاليه انا فاهمة ان انا الغلط بس ايه المشكلة ما نستمتع بحايتنا مثلا انا بحب التنطيط و السفر و السهر هو بجد بينام بدري كل يوم حتى مش بعرف اكلمه بليل و الجو ده و لما بنسهر ما بيصدق اقله يلا نروح .لو انا ماظبطتش سفريه مع اصحابنا هو مش هيفكر فا بتخنق بس هو بنسباله ليه نسافر و يبقى في حوار مع اهلك ما لما نتجوز نسافر براحتنا مثلا انا بحب الاغاني و الرقص هو مش بيعرف يحفظ الاغاني حاجة تافهه جدا بس بتحسسني بفرحه ان مثلا اكون بحب حد و يبعتلي اغنية او نقعد نغني مع بعض مثلا انا نفسي اعمل فرح كبير و نرقص و نتنطط طبعا هو رافض و وافق يعمل فرح صغير بالعافية انا مثلا جبتله هدايا كتير كبيرة لحد دلوقتي هو معظم الوقت ورد شيكولاته بس بصراحة في عيدميلادي جابلي هديه كبيرة مثلا انا طول عمري بيلفط نظري جدا الولاد الفورمه هو مالوش خالص في الجو ده ولا بيروح الجيم ولا حاجة انا عارفه اني حبيته و هو كده هو جسمه مش وحش بس برضه نفس الفكرة مش مبهورة فاهميني ؟و هو مش بخيل احنا بنقعد في احلى اماكن ناكل و نشرب ولا مرة وافق اني ادفع حرام بس مثلا انا كنت زمان احب اطلب اكل و اجرب dessert جديد و كدة هو اصلا بيشبع بسرعة و مش بيكون قادر يحلي وانا بتكسف اطلب اكتر من حاجة هو مثلا بنسباله خلاص اكل و شبع والله حرام بيقعد يسالني عايزة حاجة تانيه؟ من الاخر انا بحس ان هو بنسباله ليه ندفع فلوس في حاجات ملهاش لازمة او دي عمرها ما كانت اهتماماته او يمكن متعود من مامته انها مش بتصرف غير بحساب فا فاكر ان ده العادي معرفش بس انا بحسها ست بتحسبها في كل حاجة يعني لما جم يتقدموا جابت بونبونيره صغيرة جدا و شيكولاته متكملش كيلو و من باشونال مش باتشي و بوكيه ورد صغير و وحش اوي مثلا انا اخويا لما روحنا نتقدم جبنا ٣ كيلو مثلا من باتشى والله ياجماعة ماحدش اتكلم ساعتها بس قصدي ما انبهرتش فاهمين؟ انا عارفة ان كلكم هتقولوا انا بطبتر و اني بحب المظاهر و اني ماديه و تافهة بس والله لا انا مش فارق معايا يجبلي هدايا كبيرة بس فارق معايا اني احس انه فاكرني و مش بيستخصر فيا حاجة ديما مش فارق معايا المظاهر بس علشان هو مقتدر و مجتمعه و مركزه كويسين عايزاه يكون شكله presentable قدام اي حد عايزاه يعيش معايا سنه و نفرح بيه مش نقدي معظم الوقت اكننا عندنا ١٠٠ سنة نايمين في البيت هو كفايه انه انسان محترم و راجل و طيب و حنين بس انا نفسي جوزي ده يبقى صاحبي نجرب حاجات ملهاش لازمة و نكبر و نستمتع و نضحك مش عايزة اجوز اب ياخد باله مني و يامن مستقبلي بس برضه والله انا بحبه جدا و مقدرش اعيش منغيره هل بقى انا احساسي صح انا بحبه فعلا ولا لا ؟ و الاختلافات دي ممكن تعمل مشاكل قدام؟و برجع اقول انا مع أول طفل هتهد و مش هيكون فارق معايا كل الهبل كمان ماعنديش اسباب كبيرة تخليني اسيبه ماقدرش اكسر قلبه علشان الهبل ده ولا قلب ماما دي تفكر خلاص في فستان الفرح ولا قلبي انا رسمت حياتي معاه بس لما بشوف ولد كدة بيعمل مع خطيبته كل الحاجات الفوق دي الصراحة بغير انا فاهمه ان محدش كامل و اكيد المبهر ده عنده خوازيق تانيه بس حبيت افضفض يمكن حد يريحني من الحيرة دي, Society Problems
نوفمبر 18, 2022
-
السنه دى
مشاكل الخطوبه
- كتبو Society Problems
