مواقف: كل الاوقات | النهارده بس | الاسبوع الماضي | الشهر ده | السنه دى

البوست ده للبنات بس ♥️ طويل شويه بس هايغير حياه ناس كتير ان شاء الله ♥️موضوع الميكب والفستان والناس اللي بتقول ١٠ الاف 😦🙂😦 انا بنت متجوزه من اكتر من سنتين اتخطبت سنتين وشويه خطوبتي كانت كلها مشاكل بمعني مشاكل خطيبي كان مسافر ووالدي منفصل عننا مالوش دعوه بينا والدتي واختي هما كل حاجه واختي متجوزه في محافظه تانيه ♥️ المهم خطيبي وقتها اللي هو جوزي حاليا ربنا يبارك فيه ويحميه ويخليه لينا عملي خطوبه كبيره في قاعه وجابلي فستان وعملت ميكب وعملنا سيشن تصوير وكان جابلي دهب ب حوالي ٣٠ الف اقل بحاجات بسيطه كدا وفي الاتفاق عمل هو العفش بتاعه وانا الاجهزه الكهربائيه وكان في الاتفاق عامل اكتر ما الناس بتعمل عندنا في القريه ربنا يحميه ويبارك فيه يااارب ♥️ احنا من قريه ومفروض البنت بتعمل ركنه او اوضه اطفال او انتريه بس هو قال لا هاعمل العفش كله والحمد لله ماكنش في اختلاف في الاتفاقات🙏 كانت خطوبتنا مليانه مشاكل وخلافات ع حاجات بسيطه وتافهه بس هو مابيحبش العند وانا كنت لمضه وفي العند مابتفاهمش 😂 وهو مابيجيش بالطريقه دي زي اي شاب في سنه المهم كنا بنتخانق ومانتكلمش كتير بتوصل لشهر عادي جداا وكذا مره نسيب بعض ونرجع وحوارات كتير من هذا القبيل ☹️ كنت زي اي بنت عايزه اعمل كل حاجه واغلي حاجه مابفكرش في حاجه غير انا وبس الحقيقه كنت طماعه وشايفه ان الراجل يستحمل ويدفع دم قلبه زي ما بشوف البنات بتقول في الكومنتات كدا 😂 ووالدتي ربنا يخليها ليا عايزه تعملي احسن حاجه والناس كلها تتكلم عن فرحي وعفشي وخطوبتي زي اي ام عايزه بنتها اسعد واحده بس امي كانت عامله حساب للناس زياده شويه وانا كنت كدا مش هاكدب وكان هاممني اوي المظاهر الكدابه دي ولازم احسن فرح واحسن قاعه واغلي فستان وميكب وكل التفاصيل دي 🙂 وكان اي مشكله بينا معايا حق مش معايا والدتي في صفي وعمرها للاسف ما قالتلي انتي غلط لا كل مره انا الصح وخطيبي الغلط مع اني كنت مستفزه وطول الوقت بفكر في نفسي طبعا كنت غلط😦 لحد ما اخر مره كنا خلاص بنفركش الموضوع وكنت هاموت لو فركشنا بس العند اللي جوايا كان مخليني اعمل مش فارق واقول خلاص مانكملش عادي والاهل اتدخلوا واختي جاتلي كانت متجوزه بعيد عننا في محافظه تانيه وخدتني معاها يومين وكلمتني ♥️وكان اجمل يوم في حياتي يوم ما كلمتني ♥️علمتني في اليوم ده ازاي احافظ ع خطيبي وبيتي وابقا بنت اصول بجد مش كلام وبس ♥️ربنا يبارك فيها ويحميها ويبارك في اولادها واقدر اكون ام زيها كدا يارب ♥️ قالتلي اول حاجه عمر ما في بيت ربنا بيبارك فيه بالاسراف والطمع والانانيه والاسراف والفشخره👏 فهمتني ان خطيبي ده هايكون جوزي وابو ولادي وكل قرش نوفره احنا هانتبسط بيه وان المظاهر كدابه والناس مش مهم كلامهم الاهم حياتك في بيتك ♥️ ان البركه بتيجي من اننا بنراعي بعض ونحس ببعض وتكوني امه مش عدوه وتخافي عليه اكتر منه وتفكري فيه زي ما بتفكري في نفسك ♥️ ان لو عندك ابن وحياته زي خطيبك وانتي امه هاتقبلي يصرف الفلوس دي ع الفستان والميكب والفرح والحاجات اللي والله لا ليها لازمه ولا بتنفع في حاجه غير انها بتكون سبب في بدايه حياتكوا بمعاناه وديون ع جوزك اللي هو بقا حياتك وبيتك قولتلها لا طبعا ما اقبلش ع ابني يتمرمط كدا 😂 قالتلي ان الفشخره الكدابه بيبص عليها الناس الجعانه بس اما الشبعان عينه مليانه وبيراعي ربنا وبيحافظ ع فلوسه وفلوس غيره ♥️ كل بنت عايزه تفرح طبعا بس الفرحه مالهاش دخل بفرح غالي واغلي فستان واغلي ميكب وكل الافتري ده ♥️♥️ والله العظيم الكلام يومها كان من بوقها لقلبي ع طول ماخرجش منه لحد اللحظه دي وان شاء الله عمره مايطلع ♥️♥️خطيبي وقتها كان مسافر لسا وبيبدا حياته ووالده متوفي ومالوش اخوات وكل حاجه عليه هو وكان كلمه مطحون دي ما تجيش حاجه جنب حياته حبيبي ربنا يجازيه خير ع كل يوم غربه وكل لحظه تعب وكل يوم اتمرمط فيه علشان يكون نفسه ♥️كان دايما يقولي بلاش حاجات كتير في جهازك هاتتركن حسي ب امك وراعي انها بتتعب مش لازم تجيبي حاجات كتير هاتي اللي هانستخدمه بس وكان بيتخانق معايا والله اما بجيب حاجات كتير وغاليه ربنا يحميه ويخليه لينا يارب ♥️♥️امي كانت عايزه تجيبلي احسن حاجه زي ما قولتلكوا وتفرح بيا وهي احسن ست في العالم طبعا ربنا يبارك فيها ويجازيها خير ع كل دقيقه تعبت فيها علشاني ♥️♥️بس كان موضوع الناس فارق معاها اوي وعايزه تخلي كل الناس تتكلم عن فرحي والعفش بتاعي المهم مفروض العفش في القريه بيلف من بيت العروسه للعريس خطيبي كان رافض المبدأ ده وانا وامي موافقين ولازم طبعااا يلف 😂 بعد كلام اختي فوقت وحسيت قد اي انا انانيه وطماعه فعلا وبهتم بالفشخره ومش حاسه بخطيبي وقررت يومها اللهم لك الحمد احسن قرار في حياتي كلها ♥️مافيش فرح 😁 مافيش لف بالعفش 😁 مافيش احسن ميكب مافيش اغلي فستان 😎 اها والله زي ما بقولكوا كدا ساعتين كلام مع اختي قلبوا حياتي ♥️ خطيبي كان مصدوم وازاي امبارح واحده طماعه وانانيه بتكلمه تتحول كدا 😂 امي طبعا قعدنا ايام مناقشات وخناقات لحد ما اقنعتها بمسانده اختي ربنا يخليها ليا ♥️♥️ قولتلها كلمتين اختي قالتلي احفظهم 😂 تختاري ياماما اكون مبسوطه في الفرح والعفش بس ولا باقي حياتي مستوره وسعيده وبخير ♥️ عيطت طبعا وقالتلي اكيد يابنتي فرحتك وسعادتك واقتنعت الحمد لله مع انا كان الفرح بالنسبالي اهم من العريس نفسه 😂😂 اها والله 😂 عملت ميكب عند واحده كانت لسا جديده ب ٨٠٠ جنيه وواحده صاحبتي كان عندها فستانها اخدته منها واديتها ٥٠٠ جنيه ايجار والله 😂 كنت هانزل اشتري فستان من القاهره في رنج ٢٠٠٠ من عباس العقاد قالوا في ناس كتير بتبيع وكنت مقرره مافيش ايجار هاشتري وبعد كدا يطلع لله ♥️ والحمد لله كتبنا الكتاب واتصورنا بالفستان والبدله وزفه عربيات وفل اوي الحمد لله ع كدا ♥️ يوم فرحنا بقا بعد ما وصلنا البيت واحلي يوم في حياتي ♥️♥️♥️ صلينا واكلنا وهزرنا واتكلمنا واليوم الحمد لله سهل وبسيط وووالله ربنا مبارك في كل حاجه ♥️♥️ الاقي جوزي مطلع فلوس كتير ازيد من ٤٠ الف يومها ويقولي دول تقولي عايزه تعملي اي ووالله لا يتنفذ لو عايزه تاخديهم كلهم ليكي ♥️♥️ حبيبي ربنا يحميه ويخليه لينا يارب قولتله بكل ثقه والله وقتها وكانت من قلبي وحسيت بالكلام ان ده طبعي وحقيقه قلبي مش تمثيل وطمع زي الاول 😂 قولتله خد دهبي بيعه ويبقا معانا فلوس مركونه لاي ظرف او لا قدر الله حصل حاجه مش عايزه فلوس كفايه انت عليا ♥️♥️ ووالله كنت صادقه في كل حرف وربنا شاهد ع كلامي ♥️ من فرحته بيا وبالتحول اللي حصل في اخر كام شهر قبل الفرح مش مستوعب مين دي 😂 وجالنا فلوس كتير من صحابنا وقرايبنا وكان ربنا مبارك والله في كل حاجه لدرجه والله كنا ناكل نحس الاكل ما بيخلصش 😂♥️وسافرنا اسبوع هاني مون كان مفرض ٣ اسابيع قولتله لا بيتنا وحشني وصممنا نرجع بيتنا والمفاجاه بقا بعد حوالي شهرين كنا سافرنا وعملنا اجمل حاجه في حياتنا عمره وشوفنا بيت ربنا وكنت هاموت من الفرحه اقسم بالله اول ما شوفنا الكعبه قدامنا كدا كان نفسنا في توأم ودعينا كتير وربنا كرمنا الحمد لله ربنا يحميهم ورينا بيرزقنا من وسع دايما اللهم لك الحمد وبيتنا بقا مبارك الحمد لله من ربنا♥️مهما اقول والله مايكفي في حبي ليه ورجولته وتربيته واصله اي حاجه مهما اقولها قليله عليه ربنا يحميه ويبارك فيه واقدر احافظ عليه واكون استاهله ♥️ طولت جدا عليكوا بس عيطت كتير والله وانا بكتب وزعلت ع كل يوم كنت طماعه وانانيه فيه وعنيده وشايفه ان الست زي الراجل كلمه بكلمه وموقف بموقف وتعمل يبقا هاعمل وده خلاني اخسر ايام كتير في زعل وخناق وبهدله ☹️ افهموا ان الراجل عايز الست زي بنته وزي امه قولوا حاضر ونعم وحقك عليا وانا اسفه مش هايتكرر تاني ولو حد غلط فيكي ما تقبليش غلط ولا حد يدوس ع كرامتك ولا تقبلي اهانه ده مافيش فيه كلام ♥️ البركه بتيجي من اننا نراعي ربنا ونحافظ ع نفسنا وفلوسنا وما نبقاش مسرفين انا مش شيخه ولا احسن واحده في الدنيا بس فهمت الحمد لله الصح فين ومشيت عليه وشوفت نتيجته في حياتي اللهم لك الحمد داخله ع ٣ سنين لا في كلمه وحشه ولا خناقه ولا قله قيمه كله الحمد بخير وسعاده حتي الزعل حلو ما بيعديش يوم ♥️♥️ امه واخته من يوم مادخلت بيته وانا بنتهم وشايلاهم في عيني وهما حاطيني جوه عنيهم وبقيت اغلي من ابنهم والله عندهم 😂 قرروا حياتكوا ووفروا المظاهر الكدابه ووفروا كل قرش ليكوا هاتفهموا ده بعد الجواز ♥️♥️ الفرح مش احسن حاجه في الدنيا ولا الميكب اللي هايخليكي نضيفه ولا اغلي فستان هايخليكي بنت ناس كل دي مظاهر والله ♥️ في اكتر بكتير اوي وانتي نايمه مبسوطه ومطمنه ومافيش زعل ومشاكل وربنا مبارك فيكوا وفي ولادكوا وحياتكوا ♥️ كل حاجه بنعملها هانتحاسب عليها والله والاسراف ده مش حاجه بسيطه هاتعدي كدا لا ده بيتكوا والله بيفضل باقي حياتكوا متاثر بيها والغم والزعل مالي بيتكوا خدوا بالكوا بالله عليكوا ♥️ اخيرا ادعوا لامي واختي وجوزي واهله وولادي وربنا يبارك فينا وفيكوا يارب ♥️ قره عيني هنا طبعا وهايشوف الكلام ده ربنا يخليك لينا حبيبي ♥️ , رايك يهمنا