مواقف: كل الاوقات | النهارده بس | الاسبوع الماضي | الشهر ده | السنه دى

من غير اسم ولا صوره لو سمحت انا مرتبطه بواحد كنا أصحاب بقالنا سنين بس مش قريبين.. هو بيحبني من زمان وفضل ورايا لحد ماوافقت نرتبط.. هو ماديا واجتماعيا مرتاح جدا ومن عيله كبيره جدااا بيفضل يقولي هجيبلك وهعملك وكده وانا اصلا ف دماغي حاجه كان يهمني أنه بيحبني بس .. انا كنت بسمع من أصحابنا أنه بخيل بس انا ماكنش في بيناوتعامل عشان اعرف ..عيد ميلادي عدا علينا ف اول ارتباطنا وماجبليش اي حاجه ولا حتي لمحلي أنه عايز يجيلي حاجه مع اني كنت شايفه أن اي حاجه بسيطه هتقربه مني وخصوصا اني لسه مش بحبه اوي وهو عايز يكسبني .. وانا كنت طالبه منه اننا نتقابل بره قبل مايجي لاهلي عشان انا اقدر أقيم مشاعري اي ناحيته وتحدد موضوع للبخل ده لاني مش هعرف اتعامل معاه لو كده وكان كل مره يطلع بحجه غير اللي قبلها ونأجل المقابله .. جينا خرجنا و دي كانت اول خروجه لينا واحنا مرتبطين فهو مش عارف اماكن قالي شوفي عايزه تروحي فين اختارت مكان كافيه عادي لقيته بيقولي ده غالي ده الاكل فيه ب75 ج والشاي ب 25 ف انا اتصدمت من رده لأن دي الاسعار العاديه ف اي كافيه بس قولت يمكن مش معاه فلوس .. قولتله اختار انت مكان وداني مكان والمفروض اننا متفقين هناكل بره وكده عشان كنا نازلين من الصبح لقيته بيختار من اقل حاجه ف المنيو زي المكرونه الباشميل أو طبق بطاطس كده يعني مش اطباق رئيسيه الويتر قال ماينفعش لازم طبق رئيسي لقيته بيقول ممكن ماناكلش وبعدها قالي اختاري طبق وتبقي ناكله احنا الاتنين راح جاب طبق رئيسي وطبق بطاطس حتي ماجبش المكرونه ولا جاب سلطات ولا اي حاجه وفعلا اكلنا احنا الاتنين من نفس الطبق … وبعدها كان عايز يطلبلي بيبسي بما أنه ارخص مشروب بس انا طلبت عصير مكانه وبقي بيبص ع سعره ف المنيو قبل مايطلب واحنا مروحين عجبتني حاجه صغيره ب 10 ج لقيته بيفاصل مع الراجل … انا من ساعتها اتقفلت منه مش عارفه اتعامل معاه انا والله عمري ماكنت بدقق ف الفلوس وعيني مليانه بس عشان عندي تجربه قديمه مع البخل ده مش عايزه اكررها .. كنت بتكلم معاه بهزار اني عايزه عروسة المولد لقيته بيقولي انتي مش شغاله هاتيها لنفسك ممكن يكون بيهزر بس ردوده كلها بقيت يترجمها بخل مش لاقيه رد تاني .. ياريت حد يقولي اتصرف ازاي وأبعد ولالا وهو كده بخيل ولا حريص ولا انا اللي فاهمه غلط , رايك يهمنا